OMAGGIO DI VIVIANI AI NOSTRI SOLDATI

- Che tieni?      - Sto 'nguaiato.  - E va 'dicenno.
- Signor tenente,accumminciammo 'a coppa:
so' surdo, veco poco...- Bravo! e dopo?

-appriesso? -'Ncopp' 'o cuollo me sta ascenno
sta noce, ca m'accoglie appena ' antoppo.
E po' n'affanno si cammino troppo
e 'a duje tre mise nun sto digerenno.

- Mo accuminciammo 'a vascio. tiene 'e calle?
-Gnorsì, tengo 'e dulure articulore
e 'nfaccia 'e cosce cierti macchie gialle.

-Aggio capito, va' : tu vuo' parti'!
Idoneo! -Comm' 'ofaccio 'o militare?
-Pe' me surtanto o' fronte può guarì'.

Vestuto cu nu zaino,nu quintale;
scarpe cu 'e chiuve; 'ncuollo, na ribotta,
tre gghiuorne e quatto notte 'int' 'a tradotta:
direttamente o' fronte: Cividale.

Penzaie: "Comme principio nun c'è male!":
ma, appena ca sentette 'a primma botta,
nu zumpo, e se 'mpezzaie dinto a na grotta;
vedette 'e sagli' 'ncielo nu bengale.

"Ma stammo a' festa 'oCamene o all'inferno?"
Nu fuoco 'e fila tutt' 'a batteria.
Dicette: "Quant' 'è bello o Pataterno,

aspettavano a mme!" Ma, areto 'e spalle,
strillavano: "Savoia! La fanteria!"
E s'avett' 'a scurda' pure d' 'e calle.

Nu cuorpo a cuorpo. O povero malato
d' 'e mille malatie pigliaie curaggio:
"primma che accide a mme, t accidarraggio!
Chist' è 'o mumento che aggi' 'a fa' 'o surdato!"

Pe' 'mmiez 'o spara spara, 'o cchiù sfrenato,
chiuveva sango comm'a n'acqua 'e maggio!
"'A sotto! Comme 'o scanzo stu viaggio?!"
"Aspetta, carugno' t' aggio afferrato!"

" Avanti!" e facett' isso 'o cumannante
'nnanze 'e cumpagne. " Avante!" e ll'ate appriesso
sott'a ttro'nole 'e schegge. " sempre avante!"

E chillo ca penzava 'e nun parti',
chillo d'è mmalattie, comm' a nu fesso'.
avett' 'a fa' ll'eroe, ma pe murì'.